Aìnas

A tui, amigu, fatzu isciri

ca is mass media funt aìnas.

E, si permittis, t’ispiegu :

fax, computadora, telèfunu,

radiu, tivù e giornalis

nascint in sa propiu terra

e funti de tot’una genìa.

No funti bonas ni malas,

ma podint essi s’una o s’àtara,

segundu chini dhas imperat.

Chi siant bonas o malas

dipendit de tantis cosas :

de sa scera chi ti potant,

de chini, po ita e cun ita

brintant in domu tua

e lòmpint in manus tuas.

Internèt est... petiatzu

ca genti de trassa mala

fai brintai animaledhus,

« virus » parit chi si nerint

e acantu brìntant arròinti

che topi in magasinu !

A intrus podis agatai

cosas lègias, pentzamentus

malus che latt’e lua

e faint effettu siguru

che truìscu a s’anguidha

o bomba in cresia prena !

Avvelenanta sa genti,

distrugint is traditzionis

prus sanas de is Antigus.

Bénint e pàssant, ispèru,

che burriana in s’istadi

o che pilloni in s’ierru :

hoi ‘ndi prenit su padenti

e cras est giai partiu ! 

Fradi caru... modernu,

custu narat craru e tundu :

imperendi cussas aìnas

no depis essi... pipiu.

Si brintas in Internèt

e no donas attentzioni,

‘ndi bessis mali pigau

a pustis oras y oras

che topi in arratonera !

Si a i custas cosas t’imbitzas

lassas de ligi e iscriri

e perdis témpus e vida

in fumu, cinixu e bentu...

Funti cosas de imperai

cun sentidu bèni postu.

Custas pitziàlas modernas

de bonu tenint, iscìu,

ca lòmpint a s’àturu mundu

in témpus de lampu e tronu!

Brìntant in dogna domu

che pégus in tanka alena,

o mrexani in cot’e crabitus !

Hoi, a su chi ti nàrant,

funt aìnas chi abisongiant,

modernas, segretas, siguras.

No ‘ndi podis fai de mancu

che de s’àiri po’ is prumonis !

Tui podis fai de totu :

contus, littras, bruscierias !

Podis, cument’e nudha,

fai puru fortuna manna !

Diciosu su chi connoscit

segretus, puntus e gruxis,

buttonis, giàssus e bìas,

fuedhus cunventzionalis

e nùmunus sentz’e contu !

Abérit contus in banca

serrat, pigat e ponit

in logus mai connotus !

Totu si giustifìcat :

témpus, dinai, e... furas.

Totu si podit biri,

bendi, comprai e... fai

fintz’ e cun is... pipìus ! !

Màncanta leis severas

po’ regulai custa giungla

chi est potendi a sa moti

is pòberus giai in miseiria !

Deu no dhu hap’arribai,

ca custas aìnas modernas

hoi funt’ ancora nascendi,

ma podit essi chi arribit

sa dì chi sa genti, iscrétia,

torrit a is tèmpus connotus,

cumprendat e iscioberit

su chi est siguru e sanu,

fidau che tui cun tui.

No arriciu cun coru allirgu

iscèras, litras... filtradas

fridas, crutzas, connotas

de barracelus pagaus

po agiudai a controllai

genti, dinai, bideas

e sentimentus alenus !

« Torrint is annadas bonas

e s’abundantzia a piscinas » !

Torrint a si preni is pratzas

de genti po is cantadoris !

Torrit allirga sa mèsa

cun pani, binu e pètza,

pisci arrostiu y amori,

sentz’e televisioni ! 

S’annu 2000     (Arrafieli boi)