I flums 

Il flum plui lunc te regjon al è il Tiliment (Tiliaventum) 172/Km. Al nas tal Pas de Maurie adalt di For Disore e al bagne Dimpeç. 
Po al cjape lis aghis dal Lumiei che al ven jù di Sauris, chês dal Dean dongje Vile di Cjargne, chês de Bût, tacât di Tumieç. 
La Fele lu alimente daprûf di Stazion di Cjargne. La Fele e je ancje il so tributari plui grues.
Al jentre in planure passant dongje Osôf e tra Sant Denêl e Spilimberc. Dopo si sbasse viers il mâr tocjant Sant Vît e Tisane.

Par une biele trate al fâs di confin jenfri il Friûl – Vignesie Julie e il Venit. 
Al sbocje a estuari tal mâr Adriatic tra Lignan e Bibion.

La Fele e nas des caseris di Ugovize, si sbasse viers la Siele di Cjamparòs dulà che e cjate il spartiaghis cu la Austrie. E passe la Val Cjanâl e il Cjanâl dal Fier fin a saltâ fûr tal Tiliment a Stazion di Cjargne.

Il flum cu la plui grande puartade di aghe al è il Lusinç (Aesontium), 130 km. Al è stât teatri di tantis batais sanganadis inte prime vuere mondiâl.
Al nas in Slovenie (Mont Jalovec) là che al fâs la gruesse part dal so percors. 
Al jentre in Italie dongje Gurize. Al ricêf lis aghis dal Vipau (il so tributari plui impuartant) e de Tor (cuant che la Tor indi à).  
Al rive ae fôs dopo une vore di voltadis. Al sbocje tal golf di Panzan cul branc de Sdobe cuant che  il branc de Cuarantie (plui a est) al è stât sierât intal 1937 par no dâ fastidi ai Cantîrs di Monfalcon.

La Livence e nas tal Cansei ma o podìn dîle un flum furlan parcè che i tributaris di çampe i puartin plui aghe di chei di diestre. E fâs par un toc di confin framieç il Friûl – Vignesie Julie e il Venit, tacât di Sacîl.

Il Nadison al da sù tal comun di Taipane, al va fûr in Slovenie ma al torne dentri a Stupize. Al passe par Cividât, di dulà che al cor dentri cretis calcaris fin a Buri. Si varès di butâ dentri te Tor, dongje di Solescjan, ma lis sôs aghis a sparissin dispès sot, prin di rivâ fin là.

Il Judri al nas tes Prealps Juliis (Mont Colôrat), par un trat al fâs di confin cu la Slovenie; al travierse une part dal Cuei, po si sbasse in planure e si bute tal jet de Tor prime che cheste si meti tal Lusinç. Fin tal 1918 al à segnât cun dut il so percors il confin fra il Ream di Italie e l'Imperi di Austrie.

La Tor e salte fûr des Monts di Musi, e passe jenfri il Cjampon e la Mont Grande, si sbasse incassade sot de Bernadie fin a Crosis là che e alimente une dighe artificiâl. Dopo Tarcint e Nimis e tire lis aghis dal Cuarnap ma e sparìs sot tiere fin a Solescjan dulà che i rive il Nadison. Cjapât il Judri a Pieris il so jet si tache al Lusinç.

La Ciline e la Midune a nassin tes Prealps Cjargnelis e a son tributariis indirete e direte de Livence. Dutis dôs a àn dighis idroeletrichis a mont. Rivadis inte plane a àn la tindince a sparî sot  tiere.

Il teren des monts e de alte planure al è cuasi simpri calcari e travanât da la aghe.  I flums e i riui no rivin a mantignî lis aghis che a finissin sot. Cussì il Tiliment, la Tor, la Ciline, la Midune a son dispès secs. Lis aghis a scorin dabàs e po a tornin parsore come risultivis o gnûfs flums (il Stele, la Ausse, il Cuar e la Natisse,) inte basse furlane.

I flums e i riui nus preocupin par resons contrariis, cuant che al plûf tant. Il Tiliment al à inagât Tisane. La Ciline e la Midune a jessin dispès dai lôr jets fasint tancj dams. Ducj si visin de aluvion dal riul Ucue a Ugovize tal 2003.

 Il Timâf al nas tal Cjars istrian vicin de Mont Nevose e cul non di Reka al côr parsore par 55 km. Fin ae plere di Nacla dulà che al sparìs dal dut. Il so percors soterani al pues sei studiât ancjemò par 2 km. 
Al torne un pôc fûr tes grotis di Š. Kocjan (Slovenie) e si ramifiche in tancj tocs  là che une part e à dât origjin a un insieme di forans (come la Grote Gjigante). 
Un branc al salte fûr al nivel dal mâr a Sant Zuan di Duin, cun trê risultivis (e une vorone di aghe) che a fasin un sôl flum. 
Si bute tal mâr dopo 1250 metris di percors.  
Altris risultivis (a Aurisine) a alimentin l'acuedot di Triest. 
Il flum al è stât studiât tal prin Nûfcent, inculurint lis aghis a mont o molant des bisatis marcjadis.

I lâcs

Te nestre regjon no vin grancj lâcs. 
Il plui vast e font al è chel di Cjavaç che al implee un antîc agâr dal glaçâr dal Tiliment. 
Par che no si buti in palût, a àn contignudis lis sôs aghis a val cuntune bariere e po lis àn inviadis intun riul 
Par ordin di grandece e di fondece chei altris a son: 

Il lâc di Rabli, chei di  Fusinis  e cualchi lâc alpin di bielece rare  (il lâc di Bordalie, di Volaie e di Avostanis). 
Te planure o vin il  lagut di Sant Denêl  (vanzum dai antîcs lâcs morenics dal glaçâr dal Tiliment). 
Tal Cjars a son piçui lâcs, lâts in palût come chel di Doberdò.

Lis lagunis (o marinis) di Maran e Grau a son, pardabon, un sôl ecosisteme dividût fra doi Comuns e delimitât a Ovest dal Tiliment e a Est dal Lusinç. 
A son impuartantis pe flore e pe faune particolârs di “zone umide”. 
Alì a sbocjin flums di risultive (i za nomenâts Stele, Ausse, Cuar e Natisse). 
A mont e in bande des lagunis a son zonis dissecjadis sot il fassisim come la Bonifiche de Vitorie dongje Grau.

I canâi
                                   

Come che o vin za dite, la part alte de plane dal Friûl e je pluitost secje par vie dal teren che si lasse travanâ.

Par chest une volte a àn sgjavât tantis "roiis"che a cjapin la aghe dai flums prime che e sparissi. 
L’insieme des  "Roiis"  che a partivin di Reane dal Roiâl e di Seorgnan al furnive aghe di bevi a Udin, al faseve funzionâ i mulins, lis seis, lis oficinis e al permeteve aes feminis di lavâ i peçots tai lavadôrs, cence contâ il bagnâ la campagne.  
Lis roiis a continuavin la lôr corse fûr di Udin.
O ricuardìn ancje il  Canâl Ledre - Tiliment  che al cjape la aghe dai doi flums e che al è stât costruît soredut par la irigazion.