La fin dal imperi roman no à fat pierdi, intun prin moment, la impuartance di Aquilee. E je stade dispès assediade, brusade, sdrumade (soredut di Atile tal 452), ma e je simpri rivade a ripiâsi sot la insegne da la autoritât religjose. 
Une part de int e jere scjampade tal vieri puart di Grau che di cumò indevant al à scomençât a vê simpri plui pês. 
Po dopo al varà un so Patriarcjât autonom, dispès in barufe cun chel altri dongje.

Pûr, cu la calade dai Langobarts tal 568, e jere cressude la fuarce de "Civitas Forojuliana", deventade la capitâl dal Ducât dal Friûl. 
La decjadence di Aquilee e je scomençade cul mudament di sede dal patriarcjât a Cividât tal 737. 
Il domini Gotic e Langobart, contrastât dai Bizantins su la cueste adriatiche (viodi i nons di Basilian, Visepente un tic plui in dentri), al è stât rimplaçât di chel dai Francs.

I prins agns dal mileni a àn vût come protagonist il Patriarcje Popon il Grant, di origjin todescje, ghibelin e vuerîr, che al à puartât di gnûf la sede a Aquilee, ma dome par un pôc.
Tal 1077 al è nassût uficialmentri il Stât Patriarcjâl cuant che l'imperadôr Indrì IV al à concedût la investidure feudâl parsore dut il Friûl al patriarcje Sigjart (o pûr Siart).  
Cussì e je vignude sù une entitât politiche cuntun sôl comant, une sole religjon e une lenghe comune: il furlan. 
Il patriarcje al jere assistût di une largje rie di colaboradôrs e al veve un vêr esercit di difese. 
A vevin costituît ancje un parlament fat soredut dai nobii dal puest. Chescj a jerin sotans dal patriarcje, ma cualchidun, come i Conts di Gurize, al veve une largje autonomie. 
Jenfri i patriarcjis che a àn lassât une grande olme dal lôr guvier o ricuardìn: Pelegrin secont che al à restaurât tantis glesiis viers il 1200, ma soredut Bertrant di Saint Geniès, brâf come militâr, politic e grant santul de culture: al à fondât la Universitât di Cividât e al à clamât Vitale da Bologna a frescjâ il Domo di Udin.

Ni la glesie ni i Francs no àn fermât il pestefruce e il fisc dai Ongjars prime dal an 1000. I Ongjars a jerin une popolazion barbariche che e steve in Panonie (Cravuazie o Ongjarie di cumò), forsit imparintade cui Uns. 
A àn fat une desene di invasions in Italie, rivant ancje fin in Piemont dopo vê traviersade dute la Planure Padane. 
Come i antîcs vons a jerin crûts e spietâts. A copavin i oms, a fasevin sclâfs i frutins e lis feminis, a davin fûc o a sdrumavin dut daûr di lôr. 
A àn fatis altris bravadis in Europe fin cuant che i princips todescs ur àn dât il paniç.

Par colpe des devastazions e des epidemiis, il teritori de Basse al jere deventât cussì puar, cun mancjance di popolazion e robe di mangjâ che i Patriarcjis a àn vût la biele pensade di clamâ fameis slavis (da la Istrie, de Sclavanie e de Carinzie) par abitâ di gnûf la zone di Codroip e di là dal Tiliment. 
I segns di cheste presince a son in cierts toponims come Guriç, lis varis Grediscje e Gridiscjute, Jutiç, Listize, Belgrât....
Par il rest da la Ete di Mieç, il Friûl si è mantignût sot il domini dal patriarcje fin a la ocupazion de Republiche di Vignesie tal 1420.