Lis stradis romanis

Lis stradis romanis a jerin tant impuartantis parcè che a leavin la capitâl cui dominis plui lontans. 
A vignivin implantadis par che lis legjons si movessin a la svelte e par rindi plui facil ce che i Romans a savevin fâ miôr: la vuere. 
Cuant che i teritoris a jerin di gnûf cuiets lis stradis a podevin jessi dopradis in plene libertât, ma lis comunitâts dal puest a scugnivin garantî la manutenzion a gratis .
I Romans a vevin ancje un servizi di pueste une vore eficient che si fondave sul podê rimplaçâ di buride i cjavai stracs tes stazions di fermade. 
Il futûr imperadôr Tiberi, cuant che al à ricevût l'avîs che Drûs al veve vût un incident in Gjermanie, al à podût rivâ de Panonie (cumò Ongjarie) li di so fradi, dome in trê dîs di cavalcade rabiose!!! Chest al pues dâ la idee da la organizazion implantade daûr des viis.
La rêt des stradis romanis e jere fisse, fate simpri tal stes mût, metude sù prin par resons militârs, ma dopo e secondave i cumierçs par vie di tiere.

Lis viis plui impuartantis a jerin:  Salaria, Aurelia,  Aemilia, Flaminia e Appia.

La Salaria e partive di Rome lant fin te cueste adriatiche dongje Ascoli dopo vê traviersât l'Apenin. E cjapave il so non dal traspuart dal sâl. 
La Aurelia e leve di Rome a "Arelates" (Arles, te France di vuê), passant par Civitavecchia, Pisa e Gjenue. La Aurelia di cumò e fâs il stes zîr fin tal confin Francês.
La Aemilia e colegave Piacenza a Rimini.
La Flaminia e puartave di Rome a Rimini traviersant l'Apenin de Toscane e da l'Umbrie.
Lis viis nomenadis prime, si tacavin ancjemò cun altris che a rivavin in Friûl.
La Appia e leve di Rome a Capua e po a Brindisi.

Ancje achì in Friûl o vevin une  rêt penze di stradis. Se o lin a studiâ il lôr percors o viodìn che dispès chês di vuê a passin dulà che a passavin chês di une volte.

La vie Annia e partive di Rimini, e rivave fin a Aquilee, tignìntsi dongje il mâr Adriatic, dopo vê tocjât Concuardie ("Concordia" Sagittaria, dulà che si fasevin lis frecis). 
Ancje al dì di vuê, in chê citadele tacade di Puart (Gruâr) si pues viodi cualchi metri di cheste vie, tirade fûr di sot tiere dongje dal Domo.

La strade plui impuartante dal Nord Italie e jere forsit la Postumia che o nomenìn dome cumò  parcè che e finive propit chi in Friûl. E tacave a Gjenue, tocjant "Cremona, Mantua, Vicetia, Opitergium”, traviersant dute la Planure Padane. E sbocjave parsore di Aquilee su la "Julia Augusta".  Di sigûr si incrosave cun altris arteriis impuartantis dal Friûl, forsit a "Quadruvium" (Codroip  - crosere).

Une altre e partive simpri di Aquilee (Vie Gemina?). E traviersave la zone di Gardiscje (Gradisca d'Isonzo), sot Gurize e jentrave te val dal Vipau e dopo un lunc percors e finive a Julia Emona (Lubiane).

La Julia Augusta e meteve in contat Aquilee cul "Noricum" traviers dal Pas di Mont di Crôs in Cjargne, passant par "Tricesimum, Glemona, Julium Carnicum e Aguntum (Lienz)".  Indulà che ore presint e je Stazion di Cjargne al partive un secont branc che al rivave a "Virunum" (Klagenfurt),  traviers de Val de Fele. Simpri a "Virunum" si podeve lâ, partint di Aquilee, cjolint la strade par Cividât e po sù pe Val dal Lusinç e pai pas des Alps Juliis Orientâls, fin a tornâ fûr tal "Noricum". 

La vie Flaviae leve jù in Istrie pe cueste, passant par "Pietas Julia" (Pola/Pula) e po e rimontave sù fin a "Tarsatica" (Fiume/Rijeka). Un altri branc si distacave prin di Triest e al tocjave la stesse mete, taiant il Cjars par di dentri. 
Chestis a jerin lis arteriis plui impuartantis dal Friûl roman, ma a 'ndi jerin tantis altris plui piçulis che a leavin lis grandis tra di lôr.