I fûcs invernâi

I Carnis, vieris abitants celtics dal Friûl, nus àn lassât cerimoniis antighis (che a àn passât traviers la storie di Rome cul non di "Natalis solis invicti", Nassite dal soreli mai vinçût). Il Cristianisim lis à tiradis dongje, cun bon sintiment, tai acjadiments dal Nadâl.

L'om primitîf o il contadin - pastôr (plui vicin di noaltris) a jerin peâts ae tiere e ai niçui dal univiers. La vite tal frêt e jere malferme, intant che il dì al deventave plui curt e che il soreli nol scjaldave aromai. Cualchi zornade dopo Nadâl, a discuvierzevin che la lûs si slungjave di gnûf e che il soreli nol jere daûr a murî. I fûcs da la Epifanie a son une tonade di ligrie come a dî: “O varìn forsit ancjemò frêt, ma cumò o savìn che la vite e va indenant”.

“Nadâl, un pît di gjal, Prin dal an un pît di cjan, Epifanie un pît di strie” dulà che la lungjece dal pît e mostre il slungjâsi dal dì.

I pignarûi a vegnin impiâts cuasi pardut in Friûl. Cheste fieste e siere i ricuarts de nassite di Jesus Crist. Di fat il non de Befane al è un vuast de peraule Epifanie (Crist che si mostre ai Trê Rês), ma lis tradizions a van inmò plui indaûr, fintremai ai vons plui lontans.

I fûcs a son clamâts in manieris diferentis: "pignarûl" tal Friûl di mieç e orientâl, "foghere o pan e vin" in chel plui ocidentâl. I nons a saressin pardabon di plui, ma il "Pignarûl Grant" di Tarcint al à imponude la sô paronance par fame e peraule.

Lis liturgjiis pressapôc si somein dutis.  La tasse e ven tirade sù in mieç dai cjamps  cun cjanis e scartums dai contadins o cun lens menâts dongje dai zovins che ju cirin pes cjasis ca e là. Tal mieç i plantin un pâl par sostignîle.

Parsore si met dispès un pipinot (la femenate), che al figure une strie o l'an vieri, che a puartaran vie, brusantju, i bruts ricuarts dal an passât.

Une autoritât dal paîs (il sindic, il plevan, o vie indevant…) al da micje al pignarûl cuntune torce impiade intune fugarele li dongje.

Si da fûr dolçs e vin cjalt cun droghis. La fuiace di une volte no jere il paneton di vuê, ma la pinze, fate cun farine di blave, ue passe, fîcs secs e pignûi. Timp indaûr a crugnavin ancje cjar porcine o luianie cuete su la bore.  Lis feminis a jerin slontanadis dal prin toc de cerimonie (tirâ dongje e meti in tasse i lens, impiâ il fûc) e a vevin di mateâ dome pe magnocule.

Dopo di vê inviade la flame a scomençavin i cjants e i bai ator dal fûc. 

I zovins a jerin simpri i protagoniscj: a ziravin pai cjamps cun torcis impiadis tal pignarûl, come par une benedizion paiane. A la fin, cuant che il fûc al jere daûr a distudâsi, a fasevin gare tal saltâ lis boris, a mostrâ di sei deventâts grancj.

La cerimonie antighe ur contave de prossime stagjon agricule. Cuant che il fum al lave viers orient al significave un bon an: "Fum a soreli jevât, cjape il sac e va a marcjât".
Se il fûc al leve a ocident invezit:  "Fum a soreli a mont, cjape il sac e va pal mont", al jere di spietâsi une anade misare.

A Tarcint ator dal 1300, a comandavin i nobii austriacs di "Cjistiel di Porpêt" (Machland), parons di doi cjistiei te culine di Cuie.

Chel plui alt al le jù dal dut; di chel sot al reste dome un tor cu lis olmis di un afresc.
La cerimonie e vûl ricuardâ la investidure di Artic di Cjistiel, de part dal Patriarcje di Aquilee, a siôr des sôs tieris in Friûl.

Il "Vecjo Venerando" (un personaç par metât druide, par metât predi che al à une lungje barbe blancje), al impie il Pignarûl Grant e al interprete ancje la direzion dal fum. La cerimonie si fâs propit devant dal Cjistielat intant che i pignarulârs a impiin une grande rie di fûcs tes culinis ator.

Il dì da la Epifanie, il Friûl al ricuarde il passât ancje cu la "Messe dal Spadon" a Cividât (viôt te pagjine n. 13) e la "Messe dal Talar" a Glemone. A Glemone il Sindic al ofrìs al plevan un Talar di Marie Taresie di Austrie, volint mostrâ che il podê politic al è sotan di chel religjôs. 

I fûcs di Sant Zuan e di Sant Pieri

(Fûcs solstiziâi dal Istât) a son mancul cognossûts di chei dal Unvier.  Si impiin (o si impiavin) des bandis di Glemone, Vençon, Cjavaç e de Val Cjanâl - Cjanâl dal Fier. Cualchi volte i teritoris si confondin parcè che a fasin ducj i doi i rîts o ancje chel des cidulis.

Il pignarûl no si met sù  te campagne, ma tal mieç dal paîs o su la strade e tes croseris.

I fûcs estîfs a jerin presints di altris bandis da la Europe e in Asie.

Tal solstizi di Istât il soreli al rive sul pont plui alt parsore dal nestri cjâf. Cierts studiôs a pensin che cui fûcs di Jugn i vons a volessin fermâ la pôre di pierdi il soreli che si slontane simpri plui adalt, ma che, subite, al tornarà a sbassâsi viers l'orizont.

Lis cidulis

In Cjargne e te Val de Fele a son usâts (cetant di mancul al dì di vuê) a tirâ lis cidulis.
E jere une costumance un grum fuarte e si faseve in dutis lis stagjons.
A son discs di len di faiâr, sclapâts cu la manarie a piramidis bassutis, cuntune buse tal mieç e cui ors fins par che a tain miôr l'aiar. A saressin duncje piçui discs volants di len.
Si sielç un puest ert e cence arbui su pe culine. I zovins a impiin un fûc là che lis cidulis a son metudis par infogâsi. Cuant che a deventin bielis rossis e scomence la cerimonie.
Cuntun fier o cuntun len fuart, il fantat che i tocje al fâs mulinâ la cidule parsore dal cjâf, fin a dai une pocade, butantle indenant e adalt. La cidule e fâs grancj zîrs tal cîl, lassant daûr un agâr di stelutis di fûc.
I prins tîrs a jerin in onôr di Diu, de Madone, dal Plevan, dal Sindic dal paîs e vie indevant… Dopo al scomençave il moment saurît de cerimonie.
Il zovin al diseve a vôs fuarte il non de biele che i dedicave il tîr (zontantlu al so o a chel di un so cjâr amì) e uçant la cidule a rivâ fin tal cûr di jê.
Lis fantatis si jerin dadis dongje sot de culine, seneosis di sintîsi clamâ. Il baticûr al cresseve jenfri chês no nomenadis ancjemò. E jere grande la delusion di chês che no vignivin clamadis.
Si considerave il tîr des cidulis un esercizi ardît e iriverent parcè che al lave cuintri la costumance dai gjenitôrs di acuardâsi tra di lôr pal matrimoni dai fîs e al butave li la sielte agradide dai zovins.
No par nie il tîr des cidulis al jere lassât ai coscrits, che ducj i perdonavin cualchi scherç, parcè che a vevin di partî pe naie.
I fûcs artificiâi a rimplacin vuê lis cidulis. A son maraveôs, ma no àn la vene romantiche da la antighe cerimonie.

Carnavâl e “Tomâts” (lis mascaris di len) 

Intune vore di puescj dal Friûl a vevin la usance  (che e reste un tichinin ancjemò) di fabricâ mascaris di len par platâsi la muse in timp di Carnavâl.
Si devin dongje un pôc dapardut, ma plui in Cjargne e a Tarcint.
La fabricazion di chestis mascaris no jere facil e e scomençave cu la sielte dal len intal bosc (olnâr, cocolâr, aiar) che al veve di sei fuart e lizêr par podê lavorâlu e po puartâlu su la muse.
I intaiadôrs a jerin dispès boscadôrs e a vevin timp di sielzisi l'arbul plui bon, (par esempli, cuntun ramaç di tirâi fûr il nâs, cu la buse di un picot, di vê za pronte la bocje e vie indenant).  Al jere un grum di lavôr a tirâ fûr i tomâts, soredut se ur fasevin cjavei, barbe e dincj, dut a man cence zontâ pelicis o dincj di bestiis.
I imprescj di intaiâ il len a vignivin des fariis tal paîs.
 

Il Carnavâl al scomence dopo la Epifanie:  

"Il Carnavâl al jentre cu la aghe sante da la Epifanie - Il Carnavâl al scomence cuant che a metin il Signôr ta la aghe".

Cun chestis detulis si nomenave la benedizion da la aghe sante, fate la vilie da la Epifanie o il batisim di Jesus Crist che si ricuarde la prime domenie dopo dai 6 di Zenâr.
A Carnavâl la int si discjadenave e par setemanis a dilunc, i fantats morbinôs i davin sot pes stradis, tes ostariis e tes cjasis. Lis mascaris di len a jerin fatis a bleons, par complasê ancje i amîs che no i vevin pensât a timp.
Cu la muse cuvierte il biadin si faseve fuart par scherçâ cul Sindic, il Plevan  o cu la siore benestante dal borc, o par dî peraulis che nol varès mai olsât proferî.
Il colm des fiestis al colave jenfri Joibe Grasse e la ultime dì di Carnavâl (Carnavalon): cjants, bai e scherçs di ogni sorte.  Lis caravanis si dividevin in dôs fatis: chei cu lis mascaris a biel e chei cu lis mascaris a brut (i tomâts a jerin de seconde). I trops a levin ator pes stradis cun codis di canaie daûr. Si fermavin pes cjasis a cjapâ sù ufiertis (par solit robe di mangjâ) che po a metevin in vore la sere ta la ostarie.

Doman e je fieste  /  Si mangje la mignestre / Si bêf un bon bocâl / Vive il Carnavâl

Vie pal Carnavâl a mangjavin i crostui, la pinze, lis luianiis e la cjar di purcit in gjenar.
Dut câs, la prime dì di Cuaresime, ducj a corevin a cjapâ la Cinise, a paravin jù renghe, sardelon o bacalà e la condote e tornave a lâ tes sinis dal normâl.
E jere une vite plui semplice: nol jere avonde ce mangjâ par tancj, a mancjavin i imprescj di cumò che no savaressin fâ di mancul di lôr, ma la int e jere buine di gjoldise ad implen.
Ancje vuê a sorevivin chei che a fasin i tomâts. A son par metât artesans e par metât artiscj e a puartin indevant une antighe tradizion che, ta la ete de plastiche e dai materiâi sintetics, e fâs fadie a cjatâ un sboc se no chel da la esposizion intune mostre.

Krampus de Val Cjanâl

A saltin fûr ai 5 e 6 di Dicembar cun Sant Nicolau e la fieste e somee un tic al Carnavâl, cuntun piç di nordic dentri.
Cussì al leve l'afâr ai timps di une volte:
"Sant Nicolau, vistût di vescul e cu la mascare al va ator pal paîs. Al à in man il pastorâl grandon, tirât fûr di un ram intaiât.
Su pe schene al puarte une cosse plene di pachets, di ducj i colôrs e di grandecis svariadis.
I Krampus a son diauluts bonats, ma dispietôs.
A viestin une cjalcebraghe rosse cu la code e i cuars. Su la muse a puartin la mascare di diaulat dai boscs, dispès cu la lenghe difûr. I braçs a son cuvierts di une pelande di cjavre. Te diestre a tegnin, par scorie, un ramut di vencjâr. La sache plenone che a àn su la schene e sune tant che lis cjampanatis des vacjis.
Cul imbrunî, Sant Nicolau, cui siei aiutants, al va a Tarvis, fermant la int par strade e jentrant tes cjasis.
Se une persone e à tignude tal an une buine condote, i da un regalut.
Se il Sant al crôt che il cristian (frut o grant che al sei) nol vedi fat il brâf o che nol prei avonde, lu mole tes mans dai Krampus che lu scorein e lu piturin di neri cu lis lôr mans sporcjis di cjalin.
Se il puaret nol fâs bogns i dispiets, lu incjadenin, lu menin a torzeon pal paîs, i fasin altris scherçs e i tirin balons di nêf.
Po i presonîrs a vegnin liberâts, i Krampus a gjavin vie lis mascaris e par ultin ancje Sant Nicolau.
La fieste e finìs cuntune bataie a balonadis e berladis tra chei che a jerin mascarâts e chei che a jerin incjadenâts".
La cerimonie di vuê si à slizeride, ma e clame dongje ancjemò tante int.
Tai ultins agns al pâr che lis fiestis di Carnavâl a vedin cjapade une fuarce che e ricuarde chê di altris timps. O vin bisugne di divertîsi, di ridi, di sei par une dì l'incontrari di ce che o fasìn viodi. Di tantis bandis a inmanein fiestis, cun mascaris, cjars, spetacui e vie indevant...
Al è un gjoldi che nus vûl e che al rinfrescje lis tradizions dai nestris vecjos.